- Ekkert venjulegt sjónvarp
Þótt þetta hljómi frekar ótrúverðugt þá er samt mikill sannleikur í því að Maryland-fylki í Bandaríkjunum hafi ákveðið að nefna 21. september á þessu ári “Sid Meier’s Civilization V daginn.” Eins og sumir vita er Firaxis, fyrirtækið sem færði okkur hina guðdómlegu Civilization leiki, staðsett í Baltimore sýslu í Maryland, og hefur verið þar frá 1982.
Tekið af Kotaku
Nintendo hefur tilkynnt að verð og útgáfudagur næstu kynslóðar lófaleikjatölva, Nintendo 3DS, verði afhjúpuð eftir 2 mánuði, nánar sagt 29, september næstkomandi.
Þegar Nintendo sýndi vélina á E3 neituðu þeir að losa um málbeinið hvað þessi tvö mikilvægu atriði varðar, en það er þó gott að vita að við fáum að vita það einhvern tímann á næstunni.
Þess má geta að svipað var gert fyrir Nintendo DS og Nintendo Wii, en þá afhúpuðu þeir einmitt verðin og útgáfudagana í september, og viti menn, vélarnar komu á markað sama ár, í nóvember/desember. Getum við búist við því að spila Nintendo 3DS á þessu ári? Hver veit?
Heimildir: Eurogamer
Kveðja,
GameTíví
Fyrir nokkrum árum var eitt heitasta umræðuefnið um hvort PC notendur gætu keppt við Xbox notendur yfir netþjónustu Microsoft. Það hefur ávallt verið mikill áhugi á meðal leikjaunnenda að leyfa hefðbundnum leikjatölvunotendum að keppa á móti PC eigendum, og á endanum var einn leikur sem leyfði það, Shadowrun. Því miður naut hann ekki mikilla vinsælda og ekki voru gagnrýnendur spenntir fyrir honum.
Nú hefur skotist upp orðrómur um að ástæðan fyrir því að þetta gerðist aldrei var vegna þess að bestu leikjatölvuspilendur áttu ekki roð í venjulega PC spilendur. Þessu heldur Rahul Sood, stofnandi Voodoo PC og eins yfirmanns tæknimála Hewlett-Packard, fram á bloggi sínu.
“Fyrir mörgum mánuðum var undir hulunni verkefni hjá Microsoft,” segir Sood. ”Markmiðið var að brúa bilið á milli Xbox spilenda og PC spilenda svo þeir gætu keppt á móti hvorum öðrum í leikjum á borð við Unreal og Gears of War.” Var þetta víst allt hluti af herkænsku Microsoft fyrir Xbox Live. “Ég hef eftir áreiðanlegum heimildum að þeir hafi fengið bestu leikjatölvuspilendur í heimi og att þeim gegn venjulegum PC notendum… og getið hvað gerðist?” Soot segir að þegar leikjatölvunotendurnir með stýripinnana sína kepptu á móti PC notendum með lyklaborð og mús hafi þeim verið rústað trekk í trekk. Svo mikið, í raun, að “þetta hefði verið skammarlegt fyrir Xbox teymið hjá Microsoft almennt ef þetta hefði farið í loftið. Var það ástæðan fyrir því hvers vegna þeir hættu við það?”
Það hefur oft verið rígur á milli þessara tveggja hópa og eru margir PC notendur sem gætu ekki ímyndað sér annað en að spila skotleiki með lyklaborði og mús, alveg eins og það eru notendur sem gætu ekki hugsað sér að spila skotleiki nema með stýripinna sér í hönd. Þar sem það virðist ekki vera neitt að fara að gerast í þessum málum er erfitt að segja til um hvort þetta sé rétt. Vonandi fáum við einhvern tímann botn í málið.
Heimildir: Eurogamer
Kveðja,
GameTíví
Eflaust velta margir því fyrir sér hvað Nintendo ætlar að bjóða upp á þegar Nintendo 3DS kemur á markað. Eins og kunnugt er kynnti Nintendo til leiks glænýjan leik í Kid Icarus seríunni, en síðasti leikur í seríunni kom út á Game Boy fyrir hartnær 18 árum.
Kid Icarus verður þó ekki eini leikurinn sem 3DS mun bjóða upp á og á E3 voru sýndir nokkrir spennandi titlar sem munu koma út fyrir nýju leikjatölvuna. Meðal helstu titla eru:
Nintendogs + cats er ný útgáfa af gæludýraherminum vinsæla fyrir Nintendo DS. Grafíkin hefur verið bætt til muna, auk þess sem spilendur fá að leika sér við kelna kettlinga til viðbótar við krúttlegu hvolpana. Spilunin hefur ekki mikið breyst en við getum búist við að upplifunin sé önnur nú þegar þrívíddartæknin hefur bæst við og að dýrin muni reyna hvað best þau geta til þess að .
Metal Gear Solid 3D: Snake Eater er endurgerð af Metal Gear Solid 3: Snake Eater sem kom út á PlayStation 2 fyrir 5 árum. Einungis var stutt myndband úr leiknum sýnt á E3 þar sem notendur gátu lítið annað gert en stjórnað myndavélinni, en þeir sem hafa séð myndbandið hafa allir sagt að leikurinn líti jafnvel betur út á 3DS en hann gerði á PlayStation 3.
Kingdom Hearts 3D er annar af tveimur leikjum sem Square-Enix hefur sýnt skjáskot úr, en lítið hefur verið sagt um innihald hans. Hugsanlegt er að hann verði endurgerð af fyrsta Kingdom Hearts leiknum, með einhverjum breytingum, en einnig eru líkur á að hann verði glænýr…
Engin Nintendo vél væri fullkomin án Mario Kart og sýndi Nintendo brot úr Mario Kart fyrir 3DS á sýningunni. Ekki er vitað hvort hann muni koma út samhliða vélinni eða hvort hann muni koma út síðar meir, en hvenær sem það verður mun hann vekja ómælda hamingju fólks úti um allan heim enda hafa Mario Kart leikirnir alltaf notið mikilla vinsælda í gegnum tíðina.
Aðdáendur Dead or Alive slagsmálaleikjanna geta fagnað því Koei-Tecmo vinnur hörðum höndum að nýjum Dead or Alive leik fyrir Nintendo 3DS. Leikirnir hafa þekktir fyrir skoppandi brjóst og líklegt er að þrívíddartæknin verði notuð til þess að sýna dýpt þegar þau skoppa.
Paper Mario hefur hingað til haldið sig við hefðbundnar leikjatölvur en Nintendo virðast staðráðnir að breyta því og hafa birt nokkur skjáskot úr Paper Mario fyrir 3DS. Leikurinn sver sig í ætt við Paper Mario fyrir Nintendo 64 og Paper Mario: The Thousand Year Door fyrir GameCube, þ.e.a.s. hlutverkaleikur í heimi þar sem allt er gert úr pappír.
Að lokum… hvað væri Nintendo án Zelda leiks? The Legend of Zelda: Ocarina of Time er löngu orðin klassík og á dagskrá Nintendo er að skella honum í þrívídd og gefa hann út á 3DS. Besti leikur allra tíma (samkvæmt GameRankings.com og Metacritic) fær loksins athyglina sem hann á skilið.
Þessir sjö leikir eru þó einungis nokkrir af mörgum leikjum sem eru í bígerð fyrir Nintendo 3DS. Tugir leikja frá 23 mismunandi framleiðendum eru í fullri framleiðslu svo líklega verður enginn leikjaskortur á fyrstu lífdögum vélarinnar.
Stóra spurningin er einfaldlega hvenær við fáum að líta gripinn augum!
Insomniac Games og Electronic Arts hafa gert með sér samning um að þeir síðarnefndu gefi út fyrrnefnda leik sem þróaður verður af þeim fyrrnefndu, en hann er væntanlegur á Xbox 360 og Playstation 3 í óákveðinni framtíð. Þar með lýkur nærri því 15 ára sögu Insomniac Games sem PlayStation exclusive þróunaraðila, en fyrirtækið hefur eingöngu einbeitt sér að leikjum fyrir leikjatölvur Sony hingað til.
Ástæðurnar fyrir þessum nýja samning er að fyrirtækið vill stækka markaðshóp sinn sem og hreinlega breyta til. Hvað þessi nýja tilbreyting felur í sér er þó enn óvitað; starfsmenn Insomniac Games eru þögulli en gröfin um nýja leikinn.
PlayStation eigendur þurfa þó ekki að örvænta – Insomniac munu halda áfram að gera leiki fyrir PlayStation 3 og eru síður en svo búnir með Ratchet & Clank eða Resistance.
Hvenær nýi leikurinn kemur er alls óvíst, en hvenær sem það verður þá ættu Xbox 360 og PlayStation 3 aðdáendur að geta hlakkað til, enda fátt annað en gull sem kemur úr smiðjum Insomniac Games.
Heimildir: Kotaku
Kveðja,
GameTíví
Níundi leikurinn í hinni margrómuðu Dragon Quest seríu, Dragon Quest IX: Sentinels of the Starry Skies, hefur loksins fengið útgáfudag í Evrópu, en íslenskir DS eigendur geta búist við því að fá leikinn í hendurnar 23. júlí næstkomandi.
Í leiknum fara leikmenn í hlutverk verndarengils sem verður fyrir því óhappi að festast á jörðu niðri í mannsformi og án allra leiða til að komast aftur til himna. Upp úr því hefst heilmikið ferðalag þar sem hann, ásamt ljósálfinum Sandy, þarf að ferðast um fjögur horn heimsins, leysa úr ýmsum flækjum og komast aftur í sitt upphaflega form. Leikurinn skartar flottri cel-shaded þrívíddargrafík og allt að fjögurra manna ad-hoc fjölspilun fyrir þá sem vilja ekki spila einir.
Leikurinn fékk gríðarlega góðar viðtökur þegar hann kom út í Japan á síðasta ári, en Square-Enix hefur selt hvorki meira né minna en 4,26 milljón eintök af leiknum. Geri aðrir betur!
Dragon Quest IX kemur út á Nintendo DS þann 23. júlí næstkomandi, eins og áður sagði. Ekki missa af þessum!
Heimildir: Eurogamer
Kveðja,
GameTíví
Eins undarlega og það hljómar hafa tafir orðið á leikjaútgáfu í Ástralíu vegna eldgossins í Eyjafjallajökli. Ástæðan fyrir þessu er sú að ný sending af tölvuleikjum til Ástralska dreifingarfyrirtækisins Mindscape kemst ekki á leiðarenda á meðan fraktflugvélar eru kyrrsettar í Evrópu, en meðal leikja sem Mindscape átti að gefa út á næstu dögum var hinn æsispennandi Scene it? Twilight fyrir Nintendo Wii, Silent Hill: Shattered Memories á sömu leikjatölvu, og Puzzle Chronicles á PlayStation Portable og Nintendo DS. Úps!
“Vegna seinna eldgossins í eldfjallinu á Íslandi og frekari töfum á flugi verður töf á sendingu Wii leikja til okkar,” sagði talsmaður fyrirtækisins við leikjabloggið Kotaku. “Einn af stærstu fraktflugsfyrirtækjum jarðarinnar, Expeditors, hefur sagt okkur að sökum talsverðrar uppsöfnunar á ósendanlegum sendingum víðsvegar um heiminn er óvíst hvenær þeim tekst að senda allar sendingar á áfangastað.”
Greyið Ástralir. Þeir verða bara að bíða aukalega eftir Scene it? Twilight.
Heimildir: Eurogamer
Kveðja,
GameTíví
Fyrir þá sem vita ekki hvað Demon’s Souls þá er það einn af þeim titlum sem eru gefnir út og koma öllum að óvörum. Leikurinn kom fyrst út í Japan í febrúar á síðasta ári og vakti mikla lukku, og enn þann dag í dag kosta notuð eintök af leiknum yfir 5000 krónum sem verður að teljast gott fyrir rúmlega ársgamlan tölvuleik. Asíska útgáfan kom svo út ekki löngu síðar og innihélt meðal annars enska þýðingu, sem að sjálfsögðu varð til þess að fólk vestanhafs keypti leikinn í stórum stíl. Í kjölfarið gaf Atlus leikinn svo út í Norður-Ameríku, þar sem hann hefur selst í 250 þúsund eintökum, en því miður hafði fyrirtækið ekki fjárhagslegt bolmagn til þess að gefa hann út í Evrópu. Namco Bandai ætlar því að hlaupa undir baggann og gefa út Demon’s Souls í Evrópu þann 25. júní næstkomandi.
Til að byrja með verður hægt að kaupa leikinn í sérstakri viðhafnarútgáfu, Demon’s Souls: Black Phantom Edition, sem inniheldur bók með teikningum, herkænskubók og geisladisk með tónlistinni úr leiknum. Ekki amalegt það.
Ó, getur kannski verið að þú vitir ekki hvað Demon’s Souls er? Demon’s Souls er hasarhlutverkaleikur fyrir Playstation 3 þar sem spilendur þurfa að fara með persónu sína í gegnum konungsríkið Bolitariu, berjast við skrímsli, safna hlutum, bæta persónu sína, safna sálum úr djöflum, og að lokum takast á við hættulega risastóra djöfla sem hika ekki við að borða hetjur í morgunmat. Leikurinn er hreint ómannlega erfiður og má fólk búast við því að deyja þúsund sinnum í gegnum leikinn.
Leikurinn hefur einnig nokkuð frumlega fjölspilun, en allir þeir sem eru tengdir við Playstation taka þátt í henni. Hægt er að sjá skugga annara spilenda sem eru að spila á sama svæði, og á gólfinu birtast blóðblettir sem sýna síðustu 10 sekúndurnar í lífi eigandans, og það er einnig hægt að skilja eftir skilaboð til annara og vara þá við gildrum og hættum sem leynast á næsta horni. Að endingu er svo hægt að ráðast inn í heima annarra og drepa þá og stela af þeim hluta af sálunum sem þeir hafa safnað – ef það tekst.
Demon’s Souls kemur út 25. júní í Evrópu, eingöngu á PlayStation 3.
Það eru eflaust margir sem muna eftir X-COM leikjunum, en þeir eru af mörgum talir einhverjir bestu taktísku leikir sem hafa verið gerðir. Serían hefur legið í dvala síðan X-COM: Interceptor kom út árið 1998, en Take-Two hafa nú ákveðið að endurvekja nafnið og hafa sett 2K Marin, sem gerðu BioShock 2, í verkið.
Fyrir pjúristana verðum við því miður að hryggbrjóta þá með þeim fregnum að nýi leikurinn, XCOM, verður ekki taktískur leikur í ætt við gömlu leikina heldur verður þetta fyrstu-persónu skotleikur með snert af herkænskunni sem einkenndi gömlu leikina. Höfuðáherslan verður á að skapa rétta andrúmsloftið og að segja sögu sem halda fólki í sætinu allan tímann, allt í fyrstu persónu.
Aðalhetja leiksins verður alríkislögreglufulltrúi sem fær það krefjandi verk að greina og útrýma ógn sem stafar af geimverum á jörðinni.
XCOM er væntanlegur á Xbox 360 og PC, en engin dagsetning hefur verið gefin upp.
Heimildir: Eurogamer
Kveðja,
GameTíví
Svona leit X-Com út fyrir 17 árum.
Konami og Kojima Productions hljóta að hafa tapað glórunni því í fyrradag var samstarf Metal Gear Solid: Peace Walker við vörumerki á borð við Pepsi og Doritos afhjúpað með pompi og prakt á blaðamannafundi í Tokyo. Jább.
Í Metal Gear Solid: Peace Walker munu leikmenn geta klætt sig í boli merkta lógói AXE snyrtivaralínunnar, lesið tímarit á borð við Dengeki, Famitsu og Weekly Shonen Jump, japlað á Doritos, drukkið Mountain Dew og Pepsi Nex (drykkur sem fæst eingöngu í Japan og er svar Pepsi þar í landi gegn Coke Zero), og falið sig í… heyböggum úr Assassin’s Creed?!
Ef það er ekki nóg, þá er einnig auka mode í leiknum þar sem leikmenn berjast við skrímsli úr Monster Hunter leikjum Capcom.
Ekki vantar heldur Metal Gear Solid: Peace Walker vörur í kjötheiminum. Fyrir tæplega tveimur vikum dreifði drykkjaframleiðandinn Suntory Mountain Dew dósum sem skörtuðu myndum af persónum leiksins. Square-Enix hannaði einnig flottar fígúrur eftir persónum leiksins. Japanski skynditískurisinn Uniqlo ætlar svo að selja Metal Gear Solid: Peace Walker boli í gegnum UT línuna sína á 1500 yen (ca. 2050 kr.) stykkið frá og með 26. apríl næstkomandi. Hverjum bol fylgir kóði sem opnar fyrir alveg eins bol í leiknum sjálfum.
Auglýsingabransinn er afar voldugur í Japan, og samstarf Metal Gear Solid: Peace Walker við þessi voldugu vörumerki virkar lógískt innan japanska markaðarins. Í auglýsingum birtast frægir japanskir listamenn og auglýsa allt frá tryggingum til tyggigúmmís og yfirleitt er engu til sparað.
Hideo Kojima vill þó ekki meina að hann sé að hóra út vörumerkinu sem hann hefur mótað í gegnum tíðina. Á Twitterreikningi sínum segir hann: “Það hefur mikið verið fjallað um núverandi samstarf í fréttum á viðskiptalegum nótum, en ég gef eina ástæða fyrir þessu. Ég vil koma notendum (innsk. fólki væntanlega) á óvart. Ef samstarf kemur fólki ekki í opna skjöldu og er ekki ferskt sleppi ég því. Þetta er ekki eins og auglýsingavarningur frá Hollywood.”
Enn er óvíst hversu mikið af auglýsingavarningi í leiknum endi í vestrænu útgáfunni, en leikurinn kemur út í Evrópu á þjóðhátíðardegi Íslendinga, 17. júní.
Heimildir: Kotaku, Hideo_Kojima @ Twitter
Kveðja,
GameTíví
Pepsi Nex í miðjum frumskóginum… en ekki hvað?!
Það drekkur enginn Pepsi án þess að borða Doritos líka
Þegar Pepsi Nex er ekki nóg kemur Mountain Dew til hjálpar
Loading ...
Nýleg comment