Monthly Archive for September, 2007

Halo 3 kom, sá og sigraði ef marka má fyrstu tölur frá Microsoft. Samkvæmt útgáfurisanum seldist leikurinn í svo mörgum eintökum að veltan af sölunni á honum í Bandaríkjunum einum saman var um 170 milljónir dollara fyrstu vikuna. Til samanburðar má geta að Halo 2 velti um 125 milljónum dollara fyrstu 24 klukkustundirnar eftir útgáfu þegar hann kom út árið 2004.

Það þýðir að Halo 3 velti meiri peningum en síðasta Harry Potter bókin og Spider-Man 3 á fyrsta degi. Ekki er vitað nákvæmlega hversu mörg eintök seldust á fyrstu 24 klukkutímunum en samkvæmt Shane Kim hjá Microsoft voru um 1 milljón Halo 3 leikir spilaðir á fyrstu 20 klukkustundunum.

Nokkrar verslanir hér á landi héldu opnunarteiti í tilefni útgáfu leiksins. Talið er að um 170 manns hafi mætt niður í BT Skeifunni síðasta þriðjudagskvöld, en þar vorum við GameTíví menn og munum við sýna myndbrot og viðtöl frá opnuninni í fyrsta þætti vetrarins sem sýndur verður á fimmtudaginn í næstu viku. Mikið var um dýrðir enda frír matur og gos á boðstólnum fyrir alla sem mættu og alla jafna virtust menn vera ofsalega kátir.

Þá mættu víst um 70 manns niður í MAX og keyptu sér eintak af leiknum góða. Ekki er vitað hversu mörg eintök hafa selst af gripnum hér á landi en líklegt er að þau telji í hundruðum.

Líklega verður langt í það að Halo 3 verði steypt af þessu hásæti sínu enda fáir leikir sem hafa fengið jafn mikla athygli fjölmiðla.

Heimild: Eurogamer

Kveðja,
GameTíví

Master Chief er mættur til þess að klára bardagann í þriðja og síðasta Halo leiknum.

Deila/Frétt

Þýska matsnefndin USK er ansi dugleg við allt sem tengist boðum og bönnum og þegar það kemur að tölvuleikjum virðast þeir extra skotglaðir. Nýjasta uppátæki bæjara er að banna útgáfu á hryllingsleiknum Jericho í Þýskalandi.

Jericho er þróaður af Mercury Steam með aðstoð frá Clive Barker, kvikmyndagerðarmanninum og rithöfundinum fræga sem færði okkur meðal annars kvikmyndina Hellraiser og Abarat bókaflokknn. Leikurinn gerist í Khali eyðimörkinni þar sem hópur hermanna sem eru sérþjálfaðir í hinu yfirnáttúrulega berst við ógurleg skrímsli frá örófi alda.

Codemasters, útgefendur leiksins, hafa staðfest að þeir ætli sér ekki að beygja sig og hneigja fyrir USK og hafa ákveðið að leiknum verði ekki breytt í því skyni að fá hann útgefinn í Bretlandi. Þeir vilji ekki skemma listræna sýn Barkers með því að fara í einhverjar stórvægilegar breytingar.

Jericho er alls ekki fyrsti leikurinn sem USK bannar því meðal fleiri leikja sem hafa fengið bannhamarinn eru Gears of War, Manhunt og Return to Castle Wolfenstein.

Jericho er væntanlegur á PC, Xbox 360 og PS3 seinna á þessu ári.

Heimild: Next Generation

Kveðja,
GameTíví

Þessi hressi gaur er í Jericho.

Deila/Frétt

Í tilefni af því að Gametíví er að hefjast aftur, höfum við Gametíví bræður ákveðið að hita upp með Warhawk getraun, þar sem fimm heppnir lesendur Gametíví bloggsins geta unnið sér inn eintak af nýja Warhawk leiknum sem er væntanlegur í næstu viku á PlayStation 3.

Til að vinna eintakið þarf að svara spurningunum hér að neðan, og senda svarið á gtv@skjarinn.is.

1.  Hvað heitir fyrirtækið sem gerir Warhawk leikinn ?

2.  Nefnið einn annan leik sem þetta fyrirtæki hefur gert.

3.  Hvenær byrjar Gametíví aftur ?

 Dúndrið á okkur svörum og þið getið unnið eintök af Warhawk leiknum á PlayStation 3.

Þeir sem vilja kynna sér betur þennan stórkostlega multiplayer skotleik geta kíkt á síðu leiksins sem er www.warhawk.com

Í Warhawk leiknum geta leikmenn stýrt hinum ýmsu farartækjum í mögnuðum multiplayer hasar.

Deila/Frétt

Square-Enix afhjúpaði á Tokyo Games Show í nótt þrjá nýja leiki í Kingdom Hearts seríunni. Því miður fyrir þá sem voru að vonast eftir framhaldi þá er enginn þeirra Kingdom Hearts III – það er augljóst að það verður að bíða í nokkur ár til viðbótar eftir því.

Leikirnir þrír eiga það sameiginlegt að koma á ferðatæki en ekki heimaleikjatölvur, en þeir munu koma á PlayStation Portable, Nintendo DS og svo kemur einn leikur fyrir farsíma. Hver leikur mun hafa sitt eigið þema og vera gjörólíkir frá hvorum öðrum.

Kingdom Hearts: Birth by Sleep, PSP leikurinn, mun skarta nýju tríói og er aðalpersónan víst alveg skuggalega líkur Zack, stjörnunni í Final Fantasy VII: Crisis Core sem vonandi kemur til Evrópu á næsta ári. Leikurinn mun spilast áþekkt Kingdom Hearts leikjunum á PlayStation 2 og vonandi er það eitthvað til að kæta þá sem vonuðust eftir KH3.

Kingdom Hearts: 358/2 Days á Nintendo DS verður nokkuð öðruvísi, en í honum fara spilendur í hlutverk Roxas úr Kingdom Hearts II og mun sagan vafalaust spinnast í kringum Organization XIII. Leikurinn verður í fullri þrívídd og mun verða bragðbættur með fjögurra manna fjölspilun.

Kingdom Hearts: Coded er heitið á farsímaleiknum en í honum sendir Jimminy Cricket Sora og félaga í enn eitt ævintýrið, en leikurinn gerist einhvern tímann á milli Kingdom Hearts og Kingdom Hearts II.

Heimild: Eurogamer

Kveðja,
GameTíví

Roxas verður aðalpersóna Kingdom Hearts: 358/2 Days

Deila/Frétt

Ready At Dawn, þróunaraðili Daxter og nú God of War: Chains of Olympus hefur opinberað útgáfudag fyrir þessa mini-útgáfu af PS2 leikjunum frábæru. Leikurinn mun koma út 4. mars 2008 í Bandaríkjunum og vitaskuld eingöngu á PSP.

Þá mun fyrirtækið senda út demó í næsta mánuði til þeirra sem pöntuðu það af vefsíðu leiksins fyrr á árinu. Því miður var þetta tilboð ekki opið fyrir Evrópubúa svo við verðum bara að láta okkur nægja að lesa umfjallanir annara af því.  Demóið mun innihalda eitt borð ásamt einhverju fleira góðgæti og öllu er þessu pakkað á einn UMD disk. Það er þó vonarglæta því Ready At Dawn hefur lofað restinni Ameríkunni demóinu fyrir árslok og þar sem PSP er ekki svæðislæst, þá…

God of War: Chains of Olympus gerist á undan fyrsta God of War leiknum á PS2 og segir frá þeim tíma sem Kratos var í þjónustu guðanna. Leikurinn mun innihalda allt ofbeldið og blóðið sem við kynntumst í hinum leikjunum og það á milli lúkanna á okkur… freistandi!

God of War: Chain of Olympus kemur út í Bandaríkjunum þann 4. mars á PSP. Enginn útgáfudagur hefur þó verið settur hér hinu megin við Atlantshafið…

Heimild: Eurogamer

 
Kratos er mættur aftur í minnkaðri útgáfu.

Deila/Frétt