Milljón Wii vélar seldar í Bretlandi

Wii er orðin hraðast selda leikjatölva frá upphafi í Bretlandi eftir að sölutölur fóru yfir milljón véla múrinn á einungis 38 vikum. Til samanburðar má nefna að PlayStation 2 seldist í milljón eintökum á 49 vikum og Xbox 360 seldist í sama upplagi á 60 vikum.

Ef marka má Chart Track, sem heldur utan um sölutölur í Bretlandi, á Wii um 68% leikjatölvumarkaðarins þar í landi. Á sama tíma á Nintendo DS 86% af lófaleikjatölvumarkaðnum. Báðar vélarnar seljast enn afar vel og líklega vonar Nintendo að eftirspurnin haldist, eða jafnvel aukist, fram yfir hátíðarnar enda mikill peningur í húfi fyrir fyrirtækið.

Það harðnar svo sannarlega í slagnum á milli leikjatölvuframleiðenda og næstu jól verða afar mikilvæg fyrir Sony, Microsoft og Nintendo, enda fyrstu jólin sem allar leikjatölvur eru á boðstólnum á öllum stærstu markaðssvæðum heimsins í mannsæmandi upplagi. Hver mun standa uppi sem sigurvegari? Við komumst að því … eftir áramót.

Heimild: GamesIndustry.biz

Kveðja,
GameTíví

Deila/Frétt