Kojima vill sjá Metal Gear Solid 4 í Evrópu á sama tíma og í USA, Japan

Hideo Kojima sýndi spilanlega útgáfu af Metal Gear Solid 4 í fyrsta sinn utan Japans í dag á Leipzig Games Conference. Hann kvaðst glaður að geta mætt á sýninguna sem hann heldur í miklum metum ásamt E3 og Tokyo Game Show sem haldin er í Tokyo í september á hverju ári.

Kojima sagðist ekki þola að sjá Evrópu sitja alltaf úti í kuldanum og hefur einsett sér að sjá til þess að Metal Gear Solid 4 muni verða gefinn út í Evrópu á sama tíma og hann verður gefinn út í Japan og Bandaríkjunum einhvern tímann á fyrri hluta næsta árs. Það mun þó verða strembið verk enda ekki auðvelt að þýða leik yfir á nokkur mismunandi tungumál án þess að raska útgáfuplani leikja eitthvað.

Það er því einhver von enn fyrir Evrópubúa sem þyrstir í þennan fjórða og síðasta Metal Gear Solid leik sem Hideo Kojima mun leikstýra. En jafnvel þótt leikurinn komi ekki til með að líta dagsins ljós á sama tíma í Evrópu og öðrum svæðum heimsins getum við alltaf huggað okkur við að PlayStation 3 er svæðislaus leikjatölva. Metal Gear Solid 4 er væntanlegur á PlayStation 3 einhvern tímann á næsta ári.

Heimild: Joystiq

Kveðja,
GameTíví

Þótt Snake hafi elst nokkuð í fjórða leiknum er hann þó enn harður í horn að taka.