Monthly Archive for July, 2007

Svo virðist sem Mario þurfi að hjálpa fleiri en einni prinsessu
í Super Mario Galaxy, ef marka má nýjar myndir úr japanska
tímaritinu Famitsu.

Í Super Mario Galaxy hefur Peach prinsessu verið rænt enn eina
ferðina og til þess að hjálpa henni þarf Mario að leggja undir sig
ferðalag um himingeiminn. Nýju myndirnar úr Famitsu sýna, hins
vegar, að það gæti verið að Mario þurfi ekki einungis að hjálpa
einni prinsessu í geimævintýri sínu, heldur tveimur. Myndirnar sýna
ljóshærða prinsessu í hvítum kjól sem við höfum ekki séð í öðrum
Mario leikjum hingað til, og undir myndinni er nafnið “Rosetta”,
sem við getum gert ráð fyrir að sé nafn hennar.

Nintendo hafa verið duglegir við að gefa ekki of nákvæmar
upplýsingar um söguþráð eða framvindu leiksins þar sem þau demó sem
hafa verið sýnd á sýningum hafa verið frekar stutt og svipuð í
sniðum.

Við getum væntanlega öll komist að því hver í ósköpunum þessi
nýja prinsessa er þegar leikurinn kemur í verslanir … einhvern
tímann. Ameríka fær hann í nóvember og við skulum vona að Evrópa
muni ekki sitja í skugganum lengi eftir á.

Heimild: Joystiq

Kveðja,
GameTíví

Rosetta eins og hún birtist í Famitsu

Deila/Frétt

Það eru margir sem geta deilt með öðrum sögur af eBay, góðar og
slæmar, en hér er ein sem stendur sérstaklega upp úr…

Ungur strákur í Norfolk á Englandi verslaði sér PlayStation 2
tölvu ásamt tveimur leikjum á um það bil 95 pund á eBay. Þegar
pakkinn kom heim til hans þann 20. mars síðastliðinn innihélt hann
leikjatölvuna, en ekki leikina. Í stað leikjanna tveggja var
seðlabúnt upp á 65.000 evrur, eða um 5.3 milljónir króna.

Foreldrar drengsins voru fljótir að hringja í lögregluna sem
leitar núna að eigendum seðlanna. Dómarar í Norfolk hafa gefið
lögreglunni frest fram í september til þess að finna eigendur
seðlanna, en 22. september mun málið verða lagt frammi fyrir dómi
þar sem ákveðið verður hvort haldið verður áfram með málið. Ef
eigandi er ekki fundinn fyrir þann tíma, eða í það minnsta engin
framför komin í málið, getur fjölskyldan óskað eftir því að
peningunum verði skilað í þeirra eigu.

Það er spurning hvort þetta mál muni verða til þess að auka sölu
PS2 á eBay í þeirri von um að fleiri peningagjafir lendi á
dyraþrepum Evrópubúa. Hver veit?

Heimild: Eurogamer

Kveðja,
GameTíví

Þetta er líklega talsvert minna af pening en fannst í kassanum
góða…

Deila/Frétt

…fyrir Ameríku.

Nintendo kynntu á blaðamannafundi á E3, sem nú er í gangi í
bænum Santa Monica í Kaliforníu, dagsetningar fyrir tvo
eftirsóknarverðustu leiki sína, Super Smash Bros. Brawl og Super
Mario Galaxy. Því miður hafa þeir þó ekki sagt neitt um hvenær
þessir leikir verða gefnir út í Evrópu.

Super Mario Galaxy mun koma út 12. nóvember næstkomandi
vestanhafs. Aðdáendur ítalska píparans hafa beðið leiksins með
eftirvæntingu allt frá því fyrst var farið að ræða um “Super Mario
128″ fyrir þónokkrum árum síðan og fyrir suma var Super Mario
Sunshine bara ekki nóg til þess að svala þorstanum. Super Mario
Galaxy lofar aðdáendum góðu og lítur hreint stórkostlega út. Eki
sannfærð(ur)? Kíkið á trailerinn. Hann
er vel þess virði!

Einn ástsælasti slagsmálaleikur Nintendo (ekki það að Nintendo
eigi marga slagsmálaleiki…) snýr aftur í Super Smash Bros. Brawl
þann 3. desember næstkomandi. Í leiknum munu Mario, Samus Aran,
Bowser, Fox McCloud og Link etja kappi við hvorn annan ásamt fjölda
annara persóna. Þá mun leikurinn skarta að minnsta kosti einni
gestapersónu sem ekki kemur úr Nintendo seríum, en hingað til hefur
einungis Solid Snake verið kynntur til leiks – og segir sagan að
Hideo Kojima, höfundur Metal Gear Solid seríunnar, hafi grátbeðið
Masahiro Sakurai, heilann á bak við Super Smash Bros., um að bæta
Snake inn í seríuna.

Þá kynnti Nintendo til leiks nýjan Mario Kart leik fyrir
Nintendo Wii. Leikurinn á að koma út á fyrsta ársfjórðungi næsta
árs og mun leiknum fylgja stýri til þess að – tjah – stýra leiknum.
Ekki það að Nyko eða Ubisoft hafi ekki gefið út eitt svoleiðis
áður. Þvert á móti gerðu þeir það…

Eins og kom fram hér efst þá eru þessar dagsetningar einungis
fyrir ameríku. En þetta þýðir þó að það er komin föst dagsetning á
leikina – vonum bara að það verði engar svakalegar tafir á þeim hér
í Evrópu, ef það verða einhverjar.

Kveðja,
GameTíví

 
Super Mario Galaxy er LANGflottasti leikurinn á Wii hingað til.
Hann mun verða allsvakalegur.

Deila/Frétt